na oistern dann sama scho zwa,
aber alle andern kannst vergessn heut,
glaub mir's, mir zwa san de einzigen normalen Leut.

Neh'ma da amoi de Autofahrer,
erstens san des ordentliche Schnorrer,
des Autobahnpickerl wollns net kaufn,
und mehr als 0,5 Promille wollns saufen,
ohne dabei Straf zum zahln,
de wissen selber net was se wolln.

Und zweitens sans alle Psychopathen,
kaufen se a Auto um's andre auf Raten,
weil's net fahrn können, hauns sie's z'samm,
i waaß net, wo de in Führerschein gwunna haum.
Hauptsach se sitzn in an Cabriolet,
und in Kaffehaus rennt der Schmäh.

Na guat, gemma zu de Leut, was Politiker san,
de san doch bei mir nur mehr, waaßt eh wo daham,
glaubn kannst eahna kaum no a Wort,
macht aner Petite, dann is er glei furt,
aber net in Hefn, wo unser aner landen tät,
na, auf aner sonnigen Insel, wann's geht,
dorthin laßt er si die Kronen Zeitung schicken

und von der Li Schang Gli de Badehosn flicken
bis er Vorstandsmitglied wird von an großn Konzern
und a guate Rentn kassiert bis zum Sterbn.

Jetzt sagt's ma bitte, is des normal ?
in meine Augn is des alles a Skandal.

Oder, oder zum Beispiel, de Spurtler de Narrn,
mit'n Auto müssen's bis in Wald einefahrn,
dann rennan's rund um an Wald auf da Straßn,
und lassen si die Auspuffgase in Hals eine blasn.

Des is doch heute ka Spurt mehr, gebts ihr's zua,
oder von de Fuaßballer hab' i überhaupt scho gnua,
da kaufns von Ausland an teuren Gicker nach'n andern,
und lassn unsere Guatn ins Ausland auswandern.
Außerdem na, wird a Match im Patschenkino übertragn,
derfst daham net amal huastn oder was frogn.

Na und erst die Golfer, die san ja jetzt ganz modern,
von oben bis unten, san's gesteilt die Damen und Herrn,
rennan in ganzen Sonntag über d' Wiesn und suachen in Balln
dabei is der Teufel in Teich einigfalln.

Guat des is ja immerhin no besser, so was z'machen,
als daham beim Computer allanig lachen,
nau, des san ja erst komische Leut heutzutag,
Tag und Nacht vorm Bildschirm sitzen, des is ah a Plag,
manan de, mei Meinung ist des absolut net,
weil i man, in des Kastl einischaun macht mi der Zeit bled,
aber bitte, jeder soll mach'n was er wü,
weil sag i amoi was, haaßt's glei, du sei stü,
du verstehst des net, du ghörst scho zu de oidn,
sei froh, daß mir eure Rentn zahln und euch dahoidn.

Da falln mir no ei die Leut mit de Handys,
na guat herst, wann des ana so gwöhnt is,
nur is halt bled, neulich sitz i in Wirtshaus gmüatlich beim Bier,
auf amoi tülülü, alle springen auf neben mir,
reißns Telefon aus alle möglichen Taschn,
schüttn di dabei au, und du kannst dei Hosn waschn.

Unlängst hab i bei an Preisausschreibn gwunna,
na da hob i was erlebt, des miaßt's euch vergunna,
„eine Fahrt ins Blaue", i hab glaubt i spinn,
nie mehr fahr i mit, wann i wieder was gwinn,
a Werbefahrt war's mit Matratzen und Gschirr,
i derzähl's euch, obwohl i mi a bißl schenier,
3 Matratzen hab i kauft, derweil bin i alla,
aber de hab' i kriagt zum Preis für zwa.

Na de andern, de habn ja dort kauft wia de Narrn,
es is scho komisch, dabei redn's immer vom Sparn,
i maan, bei mir is des ja was anders gwesn,
des Kladruckte hab i ganz genau glesn,
da is gstandn, pro Matratzn hab i a Garantie von 12 Jahr,
mal 3, hab i g'rechnet, san des 36 Jahr sogar.

Auf einmal schreit aner neben mir, herst Alter bist bled,
die volle Garantiezeit, derlebst du ja net.
Drauf hab i eahm mei Faust ins Gsicht einedruckt
und er hat de Zähnd einzeln in sei Hand einegspuckt.